Со желба за придонес во афирмацијата на винската култура во Македонија, развој и негување на култот кон виното, претставување и промоција на најдобрите винарии, и вкусните специјалитети и деликатеси, од денес, 29-ти септември до недела, 1-ви октомври, во комплексот „Македонско село“ ќе се одржи вториот по ред „Фестивал на виното”.
За време на фестивалските денови, комплексот „Македонско село” ќе биде место каде гостите ќе можат да уживаат во врвните вина од најдобрите винарии, искомбинирани со вкусни специјалитети и деликатеси и богатата музичка програма во единствениот и автентичен амбиент на комплексот.
Според официјалната програма, денес не очекуваат настапите на Boris & The Bend, Нокаут, Игор Џамбазов, Гуру Харе и Дарио. Во сабота на програмата се концертите на Чалгија Саунд Систем, Лидија Кочовска, Тамара Тодевска и Контра План, додека во последниот фестивалски ден ќе ги видиме и слушнеме Камелеон, Љубојна, Џамбо Агушев и Табиет.
За време на сите три фестивалски денови ќе има и чалгии, а почетокот на дневните програми е во 16 часот.
