Здружението на винари на Македонија по четврти пат го организира натпреварот за најдобро вино произведено во домашни услови.
Станува збор за манифестација во чест на младото вино или “Божоле нуво”. Заменик претседателот на Здружението Елена Богева денеска упати повик до сите домашни производители на вино да достават мостри од своето производство.
„На натпреварот може да се учествува со младо бело, црвено и розе вино. Дегустацијата и оценувањето се од страна на стручна дегустацона комисија составена од врвни енолози-винари од нашата држава, соопшти Богева.
Таа додаде дека манифестацијата има натпреварувачки, награден, поттикнувачки и културно забавен карактер.
„Од година во година се зголемува бројот на домашни производители кои се заинтересирани за оваа манифестација. Квалитетот на нивните вина е се подобар. Тоа ни е и целта, што подобри производи во домашни услови. Затоа што домашните производители се потенцијал, кој подоцна може да биде добра основа за отварање на мини винарии како мали семејно бизниси“ – нагласи Богева.
Дегустацијата и оценувањето ќе бидат на 15, а доделувањето на наградите на 16 ноември. За најдобрите вина следуваат интересни награди.
