Француското производство на вино може да се намали за 17% оваа година до рекордно ниско ниво, откако во текот на пролетта мраз нанесе штета на лозјата, особено во реонот на Бордо, кој може да изгуби половина од својата берба.
Ова го соопшти денеска Министерството за земјоделство, цитирано од Ројтерс.
Во првата оценка за овогодинешното производство Министерството наведува дека очекува бербата во Франција, која е втор по големина производител на вино во светот, да биде меѓу 37 и 38,2 милиони. Хектолитри наспроти 45,5 милиони во 2016 година, соопштија светските агенции.
Просечната вредност – 37,6 милиони хектолитри би била за 17% помалку од минатогодишната количина и со 16% под просекот производство. Тоа би било историски минимум и помалку од реколтата во 1991 година, кога мразот повторно нанесе сериозни проблеми.
Падот на производството се должи пред се на жестоката слана во пролет, се наведува во документ на министерството.
Винарите користеа греалки и други средства во обид да ја спасат бербата во април, кога се случи студениот бран.
Минатата година поради лошото време производството на вино во Франција исто така опадна. Меѓу најзасегнатите беше регионот Шампан, каде бербата се намали за повеќе од 20% во однос на претходната година, бидејќи пролетната слана беше проследена со други проблеми. Се очекува оваа година бербата во Шампан да се опорави малку, забележувајќи пораст од 8%, но сепак ќе биде за 9% под просекот за периодот 2012-2016 година.
Бордо може да загуби половина од своето производство во однос на минатата година и да забележи пад од 40% во однос на просекот за 2012-2016 година.
Прогнозата е прелиминарна и не ги зема предвид времето до бербата, што во Франција е од август до октомври.
