Вљубениците во уметноста кои синоќа беа дел од отворањето на ликовната изложба „Ликовна група 5“, на петте големи ликовни уметници и пријатели Владимир Темков, Данчо Ордев, Илија Кочовски, Димитар Мичо Кочевски и Драган Најденовски, покрај можноста да ги погледнат делата од петте врвни автори, имаа уникатна можност и да ги пробаат вината од годинашната реколта од винаријата Наумчеви.
Најавувајќи ја дегустацијата која беше составен дел од изложбата, господинот Ѓоко Наумчев кој важи за голем вљубеник во уметноста и колекционер на уметнички дела ги покани присутните да пробаат дел од вината од неговата винарија, особено од автохтоната „станушина“ која по својот квалитет е далеку пред врвните вина од најголемите вински земји.
Со одбрани зборови, и избор на мисли од рубриката рекоа за виното, во промоцијата се вклучи и боемот и главен и одговорен уредник на www.vinotika.mk Душко Стефанов, а свој настап имаа и младите солисти и пијанисти, кои со своите изведби ги собраа аплаузите на бројните присутни.
