Брзи, релевантни, економски исплатливи анализи според светските стандарди, кои за десет минути утврдуваат 28 параметри во виното неопходни за негов пласман и на најпребирливите пазари, нуди Државната фитосанитарна лабораторија (ДФЛ).
Лабораторијата се опреми со инструментот „вајн скен“, каков што користат западноевропските земји, американскиот и австралискиот континент, и со тоа ја вброи Македонија, покрај Херцеговина и Словенија, во единствените од регионот што овозможуваат вакви услуги.
Анализите се наменети за домашните, но и за винарници од други држави, а ќе чинат вкупно 3.000 денари со вклучен ДДВ, што е помалку од досегашните, кои ги одредуваа само седумте основни параметри во виното, минимум потребни за извоз. Инструментот, меѓу другото, ќе утврдува концентрација на шеќери, киселини, алкохол, адитиви, но и на микотоксини, што практично значи и гаранција за безбедноста на виното.
Според директорката на Државната фитосанитарна лабораторија, Сузана Кратовалиева, анализите се очекува да го поттикнат производството на амбалажирано вино за извоз, но индиректно да придонесат и за развој на винскиот туризам.
– Со новиот инструмент за само 10 минути се анализираат 28 параметри во виното, со што се одредува и потврдува неговиот квалитет. Со тоа наедно се овозможува нашите вина, кои се докажани по својот квалитет, да се извезуваат и на пребирливите пазари, како јапонскиот, кој има највисоки критериуми. Се надевам дека со квалитетот и истакнатите параметри на етикетата на нашите амбалажирани вина уште повеќе ќе можеме да ги привлечеме туристите, но и да ги задоволиме нивните барања, кои се навистина високи – изјави Кратовалиева пред почетокот на семинарот.
Македонија, додаде директорката, е позната како земја на виното, но сега, со можноста да прави вакви анализи, ќе стане уште поконкурентна, особено за земјите од Западен Балкан. Кратовалиева во овој контекст ја спомна Хрватска, која неодамна воведе нови правила за увоз на вината од регионот, нивно подолго задржување на граница при проверката на квалитетот.
– Со ваквите услуги, винарниците ќе може повеќе да се фокусираат на амбалажирано вино за извоз и да постигнуваат завидни цени, кои ќе бидат во согласност со квалитетот на виното. Тоа ќе значи проширување на бизнисот и зацврстување на репутацијата не само на домашниот туку и на странските пазари – вели Кратовалиева.
Лабораторијата првпат ќе почне и со анализа на биогени амини, кои досега не се одредуваа никаде во државата, а се чувствителна категорија на секундарни метаболити што се јавуваат во различни количества при производството на вино. Во различни земји, во зависност од вкусот на потрошувачите, дозволена е и различна концентрација на биогените амини.
– Секоја година мерките, регулативите и правилниците за квалитет на вино се затегнуваат. Мора да го следиме тој тренд, да ги следиме светските стандарди. Со тоа ќе одговориме и на барањата на потрошувачите – истакна претседателот на Здружението на винарниците на Македонија, Игно Таев.
На семинарот се присутни претставници од над 40 македонски винарници, кои директно ќе видат како се врши анализата.
